TANGA, Agosti 17, 2026 Umuhimu wa kuimarisha ufundishaji wa ubunifu katika hatua za awali za elimu umejadiliwa katika kongamano linalofanyika Jijini Tanga, huku ikisisitizwa kuwa ubunifu unaweza kujengwa kupitia mchakato wa kujifunza, kuuliza maswali, kujaribu na kutafuta suluhisho la changamoto.
Akizungumza katika kongamano hilo linalofanyika katika Viwanja vya Shule ya Usagara, Dkt. Calvin Swai amesema ufundishaji wa ubunifu haupaswi kuhusishwa pekee na wanafunzi kutengeneza bidhaa au teknolojia, bali pia kujenga uwezo wa kufikiri na kutumia maarifa katika mazingira mbalimbali.
Amesema elimu ya msingi inaweza kuhusishwa na mazingira halisi ya maisha ya mwanafunzi, ikiwemo shughuli za uzalishaji katika familia na jamii kama kilimo, utalii na afya, huku akieleza kuwa mabadiliko ya dunia yanaweza kufanya mahitaji ya ujuzi na ajira kubadilika.
Dkt. Swai amesema kwa hali hiyo, wanafunzi wanahitaji kujengewa uwezo wa kutumia maarifa wanayojifunza kukabiliana na changamoto mpya, hata zile ambazo hazijaainishwa moja kwa moja katika mtaala.
Ametoa mfano wa elimu ya afya, akisema mwanafunzi anaweza kufundishwa kuhusu magonjwa yaliyopo kwenye mtaala, lakini pia akahitaji kuwa na uwezo wa kutumia maarifa hayo anapokutana na changamoto nyingine za kiafya.
Aidha, amesema suala hilo linaweza kuhusishwa na teknolojia, ambayo hubadilika kwa kasi na hivyo kuhitaji wanafunzi kuwa na uwezo wa kujifunza na kuendana na mabadiliko yanapotokea.
Katika eneo la mazingira, Dkt. Swai amesema elimu inapaswa pia kujenga ujuzi wa kufikiri kimfumo, matumizi bora ya rasilimali na uelewa wa namna ya kukabiliana na mabadiliko ya tabianchi.
Amesema uendelevu unapaswa kuhusishwa na vitendo na mtazamo wa mwanafunzi, badala ya kuishia katika kujifunza kwa kukariri.
Miongoni mwa mapendekezo yaliyotolewa ni kuimarisha ufundishaji wa ujuzi unaoweza kutumika katika masomo mbalimbali, kuongeza fursa za kujenga uwezo wa walimu na kuangalia namna ya kuoanisha upimaji na umahiri wa mwanafunzi.
Dkt. Swai pia amependekeza shule kuwa na mazingira yanayowapa wanafunzi fursa ya kufanya majaribio na kutafuta suluhisho, akisema vilabu vya ubunifu vinaweza kuongezewa nguvu kupitia mfumo mpana wa kujifunza unaohusisha shule kwa ujumla.
Hoja hizo zimeibua mjadala kuhusu namna bora ya kuandaa wanafunzi kwa mazingira ya elimu, ajira na teknolojia yanayobadilika, huku ikibaki muhimu kuzingatia mahitaji ya mtaala, uwezo wa shule na mazingira ya jamii husika.